एनपीएलको तेस्रो संस्करणलाई आईसीसीको आधिकारिक मान्यता

नेपाल क्रिकेट संघ (क्यान) ले शुक्रबार (अक्टोबर १६) विज्ञप्ति जारी गर्दै एनपीएलको तेस्रो संस्करणलाई आईसीसीले आधिकारिक मान्यता दिएको जानकारी दिएको हो। क्यानले नै आयोजना र व्यवस्थापन गर्ने प्रतियोगिता अक्टोबर २६ देखि नोभेम्बर २१ सम्म चल्नेछ।

आईसीसीको मान्यताले नेपालको घरेलु क्रिकेटको विकास, विस्तार र अन्तर्राष्ट्रिय पहिचान बढाउन सघाउने क्यानले जनाएको छ। संघले सहयोगका लागि आईसीसीप्रति आभार पनि व्यक्त गरेको छ।

सोही दिन आयोजित एनपीएल मिडिया डेमा क्यानका सचिव पारस खड्काले आईसीसीको पुष्टि कुरेर इमेल हेरिरहेको र छिट्टै निर्णय आउने विश्वास गरेको बताएका थिए।

विदेशी खेलाडी भित्र्याउन सहज

अनलाइनखबरका अनुसार यो मान्यतासँगै फ्रेन्चाइजहरूले विदेशी खेलाडी अनुबन्ध गर्दा संख्याको सीमा हटेको छ। यसअघि आईसीसीले एउटा संस्करणमा प्रत्येक फ्रेन्चाइजलाई टेस्ट राष्ट्रका बढीमा चार खेलाडी मात्र राख्न अनुमति दिएको थियो।

प्रतियोगिताको तयारीस्वरूप क्यानले कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा दर्शक व्यवस्थापन र खेलाडी, सञ्चारकर्मी तथा दर्शकका लागि सुविधा सुधार गरिरहेको छ। नेपालले नोभेम्बरमा आईसीसीको एसिया सम्मेलन पनि आयोजना गर्ने भएको छ।

यता राष्ट्रिय टोली भने ओमानमा आईसीसी क्रिकेट विश्वकप लिग–२ अन्तर्गतको त्रिकोणीय शृंखला खेलिरहेको छ। अक्टोबर १३ मा अल अमेरातमा भएको खेलमा नेपालले ८ विकेटमा २६३ रन बनाएर ओमानलाई ११३ रनले पराजित गरेको थियो। रोहितकुमार पौडेलले ६१ रन बनाए भने सन्दीप लामिछाने र नन्दन यादवले तीन–तीन विकेट लिए। नेपालले पहिलो खेलमा क्यानडालाई २४ रनले हराएको थियो।

स्रोत

The Kathmandu Post (बाहिरी लिङ्क); Onlinekhabar English (बाहिरी लिङ्क); The Kathmandu Post (बाहिरी लिङ्क)