इजरायलमा आज आमनिर्वाचन, नेतान्याहुको राजनीतिक भविष्य दाउमा

१० कात्तिक, काठमाडौं । इजरायलमा आज मंगलबार (२७ अक्टोबर) आमनिर्वाचन हुँदैछ । निर्वाचनले वर्तमान प्रधानमन्त्री बेन्जामिन नेतान्याहु सत्तामा कायम रहने वा नयाँ सरकार गठन हुने भन्ने तय गर्नेछ ।

करिब १७ वर्षभन्दा बढी समय प्रधानमन्त्री भइसकेका नेतान्याहुलाई यसपटक पूर्वप्रधानमन्त्री नफ्ताली बेनेट, यायर लापिड, पूर्वसैनिक प्रमुख गादी आइजेनकोट र पूर्वरक्षामन्त्री एविग्डोर लिबरम्यानलगायतका नेताहरूले चुनौती दिएका छन् ।

सुरक्षा मामिलामा कडा नेताका रूपमा समर्थकहरूले प्रस्तुत गर्ने नेतान्याहुमाथि सन् २०२३ अक्टोबर ७ को हमास आक्रमणका बेला सुरक्षा कमजोरी र भ्रष्टाचारसम्बन्धी आरोपलाई लिएर आलोचना हुँदै आएको छ । गाजामा युद्धका क्रममा कथित युद्ध अपराधको आरोपमा अन्तर्राष्ट्रिय फौजदारी अदालत (आईसीसी) ले पनि उनीविरुद्ध पक्राउ पुर्जी जारी गरेको छ ।

नेतान्याहुलाई दक्षिणपन्थी दलहरूको समर्थन छ भने अमेरिकी राष्ट्रपति डोनाल्ड ट्रम्प पनि उनका समर्थक हुन् ।

इजरायलको संसद् नेसेटमा १२० सिट छन् । सरकार गठन गर्न कम्तीमा ६१ सांसदको समर्थन आवश्यक पर्ने भएकाले निर्वाचनपछि दलहरूबीचको गठबन्धन र साना दलहरूको समर्थन निर्णायक हुने देखिएको छ ।