साउदी अरबमा ड्रोन आक्रमण : एक नेपालीसहित दुईको मृत्यु

कार्तिक ५, २०८३, काठमाडौं । साउदी अरबको पूर्वी प्रान्तस्थित शैबाह तेल क्षेत्रमा रहेको साउदी अराम्कोको परियोजनालाई लक्षित गरी गरिएको ड्रोन आक्रमणमा एक नेपालीसहित दुई विदेशी श्रमिकको मृत्यु भएको छ। घटनामा पाकिस्तानी र भारतीय नागरिक घाइते भएका छन्।

साउदी अरबको ऊर्जा मन्त्रालयले बुधबार विज्ञप्ति जारी गर्दै घटनामा एक नेपाली र एक प्यालेस्टिनी नागरिकको मृत्यु भएको जनाएको हो। घाइते हुनेमा एक पाकिस्तानी र एक भारतीय नागरिक छन्।

मृत्यु भएका नेपालीको नाम, ठेगाना तथा घटनासम्बन्धी थप विवरण भने सार्वजनिक गरिएको छैन।

मन्त्रालयका अनुसार तेल क्षेत्रको प्रशोधन केन्द्रलाई लक्षित गरी आएको ड्रोनलाई साउदी हवाई प्रतिरक्षा प्रणालीले बीचमै रोकेको थियो। ड्रोन आक्रमणको प्रयासका क्रममा तेल क्षेत्रमा कार्यरत ठेकेदार कम्पनीको एउटा सवारीसाधनमा आगलागी भएको थियो।

आगलागी तेल प्रशोधन केन्द्रको परिधिबाहिर भएको र त्यसबाट तेल क्षेत्रको सञ्चालनमा कुनै असर नपरेको मन्त्रालयले जनाएको छ।

घटनापछि सम्बन्धित निकायले आवश्यक कदम चालेको जनाउँदै मन्त्रालयले मृतकका परिवारप्रति समवेदना व्यक्त गरेको छ भने घाइतेहरूको शीघ्र स्वास्थ्यलाभको कामना गरेको छ।

साउदी अरबमा ठूलो संख्यामा नेपाली श्रमिक कार्यरत रहेकाले यस घटनाले त्यहाँ कार्यरत नेपालीको सुरक्षा र अवस्थाबारे चासो बढाएको छ।