रौतहटमा अज्ञात समूहको गोली प्रहारबाट युवक गम्भीर घाइते

१८ कात्तिक, काठमाडौं । रौतहटमा अज्ञात समूहको गोली प्रहारबाट एक युवक गम्भीर घाइते भएका छन् ।

जिल्ला प्रहरी कार्यालय रौतहटका अनुसार गौर नगरपालिका–४ गढवा टोलस्थित पानी ट्यांकी नजिक गोली प्रहार हुँदा स्थानीय २८ वर्षीय राकेश यादव घाइते भएका हुन् ।

गएराति सवा ९ बजे यादवमाथि गोली प्रहार भएको प्रहरीले जनाएको छ । गोलीका छर्रा उनको ढाडमा तीन, दाहिने पाखुरामा एक र दुवै खुट्टामा दुई गरी ६ वटा लागेको बताइएको छ ।

घटनापछि तत्काल उद्धार गरी यादवलाई प्रादेशिक अस्पताल गौर पुर्‍याइएको थियो । त्यहाँबाट थप उपचारका लागि वीरगञ्जस्थित नेपाल मेडिसिटी बयोधा अस्पताल पठाइएको र उनको अवस्था गम्भीर रहेको प्रहरीले जनाएको छ ।

प्रहरीका अनुसार घटनास्थलबाट ७.६२ एमएम पेस्तोलका तीनवटा खाली खोका फेला परेका छन् ।

यादवमाथि कसले र किन गोली प्रहार गरेको भन्ने खुल्न सकेको छैन । घटनाबारे प्रहरीले अनुसन्धान गरिरहेको जनाएको छ ।