७ कात्तिक, काठमाडौं । पाकिस्तानको टी–२० राष्ट्रिय टोलीका कप्तान तथा आक्रामक ब्याटर साहिबजादा फरहान नेपाल प्रिमियर लिग (एनपीएल) को तेस्रो संस्करण खेल्न काठमाडौं आइपुगेका छन्। ३० वर्षीय फरहानले प्रतियोगितामा कर्णाली याक्सबाट खेल्नेछन्।
पाकिस्तानका लागि अन्तर्राष्ट्रिय क्रिकेटमा आफ्नो क्षमता प्रमाणित गरिसकेका फरहानको आगमनले कर्णाली याक्सको ब्याटिङ पक्षमा अनुभव थपिने अपेक्षा गरिएको छ। दायाँहाते ब्याटर फरहान छोटो प्रारूपमा आक्रामक ब्याटिङ र ठूलो स्कोर बनाउन सक्ने क्षमताका लागि परिचित छन्।
फरहानले पाकिस्तानका लागि ६ एकदिवसीय र ५१ टी–२० अन्तर्राष्ट्रिय खेल खेलेका छन्। टी–२० अन्तर्राष्ट्रियमा उनले दुई शतक र १३ अर्धशतकको मद्दतमा १ हजार ५५४ रन बनाएका छन्। यस प्रारूपमा उनको स्ट्राइक रेट १३९.४९ छ।
समग्र टी–२० क्रिकेटमा फरहानको प्रदर्शन अझ प्रभावशाली छ। उनले १८६ खेलमा नौ शतक र ३८ अर्धशतकसहित ५ हजार ७७५ रन बनाएका छन्। उनको सर्वाधिक व्यक्तिगत स्कोर अविजित १६२ रन हो।
घरेलु क्रिकेटमा समेत लामो अनुभव बटुलेका फरहानले प्रथम श्रेणी क्रिकेटका ६३ खेलमा ४ हजार ७९६ रन बनाएका छन्। त्यस्तै, लिस्ट ए क्रिकेटका ८१ खेलमा उनले ३ हजार १६५ रन जोडेका छन्।
घरेलु क्रिकेटबाट राष्ट्रिय टोलीको नेतृत्वसम्म
घरेलु क्रिकेटमा लामो समयदेखि प्रतिभाशाली ब्याटरका रूपमा चिनिँदै आएका फरहानले अन्तर्राष्ट्रिय क्रिकेटमा नियमित अवसर पाउन भने लामो प्रतीक्षा गर्नुपर्यो। उनले १७ वर्षको उमेरमै घरेलु टी–२० क्रिकेटमा पदार्पण गरेका थिए। तर, प्रथम श्रेणी क्रिकेटमा पनि उनले निरन्तर उत्कृष्ट प्रदर्शन गर्दै आफ्नो क्षमता प्रमाणित गरे।
सन् २०१८ मा अस्ट्रेलियाविरुद्ध टी–२० अन्तर्राष्ट्रियमा पदार्पण गरेका फरहान त्यसपछि राष्ट्रिय टोलीबाट बाहिरिए। उनले सन् २०२४ सम्म पाकिस्तानको राष्ट्रिय टोलीमा पुनरागमन गर्न सकेनन्। घरेलु क्रिकेटमा राम्रो प्रदर्शन गरे पनि त्यसलाई अन्तर्राष्ट्रिय स्तरमा निरन्तरता दिनु उनको करिअरको प्रमुख चुनौती बनेको थियो।
सन् २०२५ को पाकिस्तान सुपर लिगमा इस्लामाबाद युनाइटेडबाट खेल्दै उनले १२ खेलमा ४४९ रन बनाए। यही प्रदर्शनले उनलाई पुनः पाकिस्तानको टी–२० अन्तर्राष्ट्रिय टोलीमा स्थापित हुन मद्दत गर्यो। त्यसपछि बंगलादेश र वेस्ट इन्डिजविरुद्धका शृङ्खलामा छ इनिङ्स खेल्दै तीन अर्धशतक प्रहार गरेपछि उनले टोलीमा आफ्नो स्थान थप बलियो बनाए।
घरेलु क्रिकेटमा संघर्ष र निरन्तर प्रदर्शनमार्फत राष्ट्रिय टोलीको नेतृत्वसम्म पुगेका फरहान अब नेपाली क्रिकेटप्रेमीमाझ आफ्नो खेल कौशल देखाउन काठमाडौंमा छन्। कर्णाली याक्सका लागि उनको ब्याटिङ एनपीएलको तेस्रो संस्करणमा चासोको विषय बन्नेछ।
एनपीएलको तेस्रो संस्करण कात्तिक ९ देखि मंसिर ५ गतेसम्म सञ्चालन हुनेछ। प्रतियोगितामा विभिन्न टोलीका स्वदेशी तथा विदेशी खेलाडीले प्रतिस्पर्धा गर्नेछन्।
अनलाइन पढ्नुहोस्: https://ujyaalotoday.com/article/pakistani-kaptan-sahibajada-pharahan-enapiel-khelna-kathmandu-ma-karnali-yaksa-b
प्रतिक्रिया
अहिलेसम्म प्रतिक्रिया छैन। सम्पादकले स्वीकृत गरेपछि प्रतिक्रिया देखिन्छन्।