एनपीएल : लगातार दोस्रो जितको खोजीमा लुम्बिनी र चितवन, वर्षा बाधक बन्ने सम्भावना

१४ कात्तिक, काठमाडौं । नेपाल प्रिमियर लिग (एनपीएल) २०२६ अन्तर्गत शनिबार लुम्बिनी लायन्स र चितवन राइनोजबीच प्रतिस्पर्धा हुँदैछ। त्रिवि क्रिकेट मैदान कीर्तिपुरमा दिउँसो साढे १२ बजे सुरु हुने खेलमा दुवै टोली लगातार दोस्रो जित निकाल्ने लक्ष्यसहित मैदान उत्रनेछन्।

प्रतियोगिताको पहिलो खेल जितेका दुवै टोलीका लागि शनिबारको खेल अर्को जित दर्ता गर्ने अवसर हुनेछ। तर पछिल्लो समय देशका विभिन्न भागमा भइरहेको वर्षाले खेल प्रभावित हुन सक्ने सम्भावना छ।

लुम्बिनीले पहिलो खेलमा सुदूरपश्चिम रोयल्सलाई सात विकेटले पराजित गरेको थियो। यस्तै, चितवनले विराटनगर किङ्सलाई आठ रनले हराउँदै प्रतियोगितामा विजयी सुरुवात गरेको थियो।

अर्नब चक्रवातको प्रभावका कारण बिहीबार रातिदेखि नै नेपालका विभिन्न स्थानमा वर्षा भइरहेको छ। शुक्रबार दिनभर वर्षा भएको थियो भने शनिबार साँझसम्म पनि हल्का वर्षाको सम्भावना रहेको मौसमविद्ले बताएका छन्। वर्षाका कारण खेल रद्द भए दुवै टोलीले एक–एक अंक बाँड्नेछन्।

लुम्बिनीको हेड टु हेडमा अग्रता

दुवै टोली पछिल्लो खेलमा जित निकाल्दै मैदान उत्रन लागेका हुन्। लुम्बिनी लायन्स अघिल्लो सिजनको पाँचौँ खेलदेखि अपराजित छ। उसले लगातार ६ खेलमा जित निकालेको छ।

दोस्रो सिजनमा प्लेअफ पुग्न नसकेको चितवनले भने यस सिजनको पहिलो खेल जित्दै प्रतियोगितामा राम्रो सुरुवात गरेको छ।

एनपीएलका अघिल्ला दुई सिजनमा लुम्बिनी र चितवनबीच दुई खेल भएका थिए। दुवै खेलमा लुम्बिनी विजयी भएको थियो। पहिलो सिजनमा लुम्बिनीले चितवनलाई ३३ रनले पराजित गरेको थियो भने दोस्रो सिजनमा चार विकेटको जित निकालेको थियो।

यससँगै हेड टु हेडमा लुम्बिनी २–० ले अघि छ। तर यसपटक पहिलो खेल जितेर आत्मविश्वास बढाएका दुवै टोलीबीचको प्रतिस्पर्धा रोचक हुने अपेक्षा गरिएको छ। चितवन भने लुम्बिनीसँगको अघिल्लो हारको शृङ्खला तोड्ने लक्ष्यमा हुनेछ।

टोलीमा परिवर्तनको सम्भावना

लुम्बिनीले पहिलो खेलमा मैदान उतारेकै टोलीलाई निरन्तरता दिने सम्भावना छ। उसका विदेशी खेलाडी रुबेन ट्रम्पलमन भने अझै टोलीमा आइपुगेका छैनन्। उनी आयरल्यान्डसँगको एकदिवसीय शृङ्खला खेलिरहेका छन्।

लुम्बिनीले पहिलो खेलमा डार्शी शर्ट, शमिम होसेन, निरोशन डिक्वेला र शाड्ली भान शाकवाइक गरी चार विदेशी खेलाडीलाई मैदान उतारेको थियो। नेपाली खेलाडीमा कप्तान रोहित पौडेलसहित सन्दीप जोरा, दिलिप नाथ, तिलकराज भण्डारी, शेर मल्ल, किशोर महतो र आसिफ शेख खेलेका थिए।

पहिलो खेलमा जित दिलाएको यही संयोजनलाई निरन्तरता दिने सम्भावना छ।

यता चितवनले पाकिस्तानी खेलाडी उपलब्ध नहुने भएपछि वैकल्पिक खेलाडी अनुबन्ध गरेको थियो। सिकन्दर राजा अझै टोलीमा आइपुगेका छैनन् भने कलिम सनाबारे पनि आधिकारिक जानकारी सार्वजनिक भएको छैन। त्यसैले पहिलो खेलमा खेलेका चार विदेशी खेलाडीले नै शनिबार खेल्ने सम्भावना छ।

चितवनका कप्तान कुशल मल्ल चोटका कारण पहिलो खेलमा अनुपस्थित थिए। उनी शनिबारको खेलमा फर्कने सम्भावना छ। कुशलको पुनरागमनले चितवनको ब्याटिङ र टोलीको सन्तुलनमा प्रभाव पार्न सक्छ।

लुम्बिनीको सम्भावित प्लेइङ ११ : रोहित पौडेल (कप्तान), आसिफ शेख, डार्शी शर्ट, दिलिप नाथ, निरोशन डिक्वेला, सन्दीप जोरा, शमिम होसेन, शाड्ली भान शाकवाइक, शेर मल्ल, किशोर महतो र तिलकराज भण्डारी।

चितवनको सम्भावित प्लेइङ ११ : डाविड मलान, देव खनाल, अर्जुन साउद, कुशल मल्ल, रवि बोपारा, डान मोस्ली, टम टेलर, विवेक यादव, कमलसिंह ऐरी, रन्जित कुमार र रिजन ढकाल।

किशोर, शर्ट, ऐरी र मलानमाथि नजर

शनिबारको खेलमा लुम्बिनीका किशोर महतो र डार्शी शर्ट महत्त्वपूर्ण खेलाडीका रूपमा रहनेछन्।

किशोरले पहिलो खेलमा चार विकेट लिँदै लुम्बिनीको जितमा निर्णायक भूमिका खेलेका थिए। चितवनविरुद्ध पनि उनको बलिङ प्रदर्शन टोलीका लागि महत्त्वपूर्ण हुनेछ।

अस्ट्रेलियाका ब्याटर डार्शी शर्ट आक्रामक ब्याटिङका लागि परिचित छन्। विशेषगरी पावरप्लेमा उनको प्रदर्शनले खेलको गति बदल्न सक्छ। लुम्बिनीले राम्रो सुरुवात गर्न शर्टको भूमिका महत्त्वपूर्ण हुनेछ।

चितवनका लागि कमलसिंह ऐरी र डाविड मलान हेर्नलायक खेलाडी हुनेछन्। कमलसिंहले विराटनगरविरुद्धको पहिलो खेलमा उत्कृष्ट प्रदर्शन गर्दै टोलीको जितमा महत्त्वपूर्ण योगदान दिएका थिए।

इंग्ल्यान्डका ब्याटर मलानले पनि पहिलो खेलमा राम्रो ब्याटिङ गरेका थिए। चितवनले लगातार दोस्रो जित निकाल्न यी दुई खेलाडीको प्रदर्शन महत्त्वपूर्ण हुनेछ।

खेल विवरण

• खेल : लुम्बिनी लायन्स भर्सेस चितवन राइनोज
• मिति : १४ कात्तिक, शनिबार
• समय : दिउँसो १२ः३० बजे
• स्थान : त्रिवि क्रिकेट मैदान, कीर्तिपुर
• मौसम : वर्षाको सम्भावना